Semana 34
Alimentación posparto
Despois de pasar polo embarazo pódeste sentir tentada a facer unha dieta estrita para perder o peso que gañaches. Terás que agardar un chisco máis se queres darlle o peito ao teu fillo ou porás en perigo a produción do leite.
Come ben
Co parto non terminou todo, máis ben acaba de comezar. Debes seguir coidando a túa dieta para adaptala a esta nova etapa que comeza: a lactación. Se durante o embarazo era recomendable un aumento dunhas 300 Kcal/día, agora debes chegar ata as 500. O teu corpo ten un enorme desgaste e tes que aprovisionalo de todos os nutrientes que esixe aleitar ao teu fillo. O incremento de enerxía terá que dar resposta a unha produción de leite duns 750 ml ao día, durante o primeiro semestre, e de 600 ml, no segundo. Pero aínda que lle deas esta achega extra, o teu corpo non terá suficiente, así que fará uso das túas reservas graxas. É por iso que as mulleres que optan pola lactación natural soen recuperar antes o peso anterior ao embarazo.
Procura un leite proteico
O mesmo ocorre cos nutrientes. Por exemplo, se unha muller embarazada debe inxerir 10 gramos máis ao día de proteínas, unha que estea a dar o peito debe incrementalo a preto dos 15 gramos extra. Isto débese a que o leite materno é moi rico neste compoñente, esencial para a nutrición do teu bebé.
Non descoides as vitaminas
Por regra xeral, as necesidades de vitaminas mantéñense máis ou menos igual ca durante a xestación. De todos os xeitos hai algunhas que se deben incrementar. Este é o caso das vitaminas E, B2, B6, B12 e moi especialmente a vitamina C que pasa dunha achega extra recomendada durante o embarazo de 10 mg a 45 mg na lactación.
Aumentan as necesidades minerais
En canto aos minerais, destaca sobre todo o incremento na demanda de iodo. Terás que proporcionarlle ao teu corpo o dobre que na xestación, xa que é un alimento clave para o teu bebé. Ti podes procurar manter unha dieta rica en iodo aumentando os alimentos de orixe mariña, pero aínda así algúns médicos recomendan suplementos. Non ocorre o mesmo con outros minerais. Este é o caso do ferro, un elemento clave na xestación que agora non precisa dun reforzamento.
Busca alimentos de calidade
Xa durante o embarazo tiveches tino de ter un menú variado e formado por alimentos de alta calidade nutricional. Agora debes seguir por este camiño e non descoidar os bos hábitos. Lembra que a achega de vitaminas débese garantir prioritariamente a partir das froitas, as verduras, os legumes e as hortalizas.
Coida o sabor do teu leite
Dentro dos alimentos naturais, de tempada e frescos, podes facer o menú diario como máis che guste. Só hai unha cousa que debes ter en conta: hai algúns que poden cambiar o sabor do leite e producir rexeitamento no bebé. Non é que lle vaia facer mal, simplemente atopará un sabor descoñecido para el. Para evitar problemas desterra da túa neveira as alcachofas, as coles, os ravos, os allos, as cebolas e os alimentos picantes.
O mito da bebida
Aínda que moita xente coida que o volume do leite materno depende da cantidade de líquido que se inxira, non é así. Soamente preocúpate de beber abundante cantidade de líquido, tal e como fixeches durante o embarazo, para manterte hidratada. Igualmente procura reducir ao mínimo o consumo de bebidas gasosas, con azucres ou excitantes. Por suposto, non abuses das bebidas con alcohol.
