Semana 24
O plan de parto
Estás no momento de pensar se queres redactar un plan de parto. Neste documento resumirás como che gustaría que se organizase o teu parto. Ti e a maternidade debedes ver como adaptalo á túa situación médica e á política do centro.
O parto pódese enfrontar de moi diferentes maneiras. O primeiro a ter en conta é se estás nalgún grupo de risco ou se tes algunha característica especial que obrigue a planificalo dun xeito concreto. Tamén terás que sopesar como queres vivir ese momento e que papel xogará o pai, ou acompañante, no parto. Asesórate sobre que opcións contas na maternidade onde pensas dar a luz.
Plan de parto
O plan de parto é un resumo escrito no que a embarazada concreta as súas preferencias para dar a luz. Nel recóllense aspectos como os medicamentos ou anestesias que queres que se che administren, a postura na que prefires dar a luz, o tipo de tratamento que se lle dará ao bebé unha vez naza… Por suposto, todo iso estará supeditado ás necesidades que se presenten no momento e ao criterio do persoal médico. Digamos que o plan de parto recolle os procedementos desexables se todo fose ben.
En España
A pesar de que esta práctica é moi usual en moitos países europeos, non é así no noso. Por iso, se tes moi claro como queres que se desenvolva o teu parto, sería recomendable que o negocies coa túa matrona para ver que cousas se poden incluír e cales non. Hai organizacións que aconsellan que se lle envíe este documento ao servizo de atención ao paciente do hospital, ao servizo de xinecoloxía e ao de neonatoloxía. Este é o procedemento ideal, pero normalmente no noso país preséntaselle unicamente á matrona para que o teña en conta. Desa listaxe, hai cousas que si serán posibles, pero outras moitas dependerán da política interna da maternidade en concreto.
Decisión persoal e opinión médica
O contido do teu plan de parto depende do que ti queiras. Pode ser un resumo de como queres que se enfoque o parto ou unha listaxe detallada das túas preferencias. Lembra que calquera cousa que poñas no plan está suxeito tamén a como vaia o parto. Prescindirase das túas recomendacións sobre a marcha se o persoal médico estima que existe algún risco para ti ou para o teu bebé.
O mellor posible
Que poñer nun plan de parto?
- Quen vai estar contigo no momento do parto.
- Se queres ou non que se che administre un enema.
- Se prefires estar monitorizada todo o tempo ou queres que se faga por intervalos para poder moverte máis libremente.
- Se queres que se che administre anestesia ou non, como a epidural.
- Se estás aberta a que se empregue algunha substancia que acelere o parto, como é a oxitocina.
- Se queres que se che aplique a episiotomía ou non.
- Quen collerá primeiro o bebé: ti, o pai ou o persoal médico.
- Quen queres que corte o cordón umbilical e cando queres que se faga.
- Se queres que o teu bebé fique contigo un tempo, antes de proceder a pesalo ou medilo.
- Que política che gustaría que se seguira despois do parto: acceso de visitas, se o bebé fica contigo na mesma habitación ou non, probas posnatais…
Máis información
Unidade de Partos do Complexo Hospitalario de Ourense
