Semana 20

Embarazo e traballo

Unha embarazada non é unha enferma, e por iso debes seguir coa túa vida normal, o que inclúe o traballo.

A maioría das mulleres de hoxe en día teñen que compatibilizar as súas obrigas laborais coa súa faceta como nai. É a tan coñecida conciliación familiar e non sempre é doado. Esta conciliación xa comeza cando estás embarazada e hai aspectos aos que podes anticiparte.

Estuda o teu ambiente de traballo

Valora o tipo de traballo que realizas xa que hai moitas actividades que non están recomendadas para unha embarazada. Non podes subir a alturas ou realizar funcións que impliquen posturas complicadas. Tampouco debes levar cargas pesadas ou estar de pé máis de 3 horas. Ademais mantente afastada de lugares con cambios de temperatura repentinos, ambientes demasiado calorosos ou fríos ou onde haxa moito ruído. Se o teu traballo implica algún destes puntos ou algún outro risco, como o contacto con substancias perigosas, lembra que podes pedir un cambio de función ou posto durante o período xestacional. Este dereito mantense durante o período de lactación, ademais da posibilidade de contar con tempo libre para continuar dándolle o peito ao teu fillo se así o queres.

No traballo

Cando dicilo?

En España non tes a obriga de comunicarlle o teu estado á empresa dentro dun prazo concreto. Pero debes ter en conta que haberá sinais externos que farán difícil que o poidas ocultar. Ademais dos cambios do propio corpo, pode que o teu rendemento laboral se vexa afectado por síntomas como as náuseas, os mareos, o cansazo etc. Tamén terás que pedir varios permisos para facer as probas prenatais, aínda que os podes xustificar como calquera outra visita ao médico. Se este é o teu caso, pensa se non paga a pena que te adiantes a que os teus compañeiros vaian sacando as súas propias conclusións. En calquera caso a decisión é túa.

Anticípate ás carreiras da fin do embarazo

Aínda verás o final do embarazo como algo distante, pero pensa que xa estás no ecuador do mesmo. Canto máis avances na xestación, máis molestias terás e non debes descartar ter que pedir unha baixa se non tes folgos para facer o teu traballo. Por todo iso, é importante que xa empeces a delegar funcións ou pasar responsabilidades a algún compañeiro ou á persoa que te substituirá durante a baixa por maternidade.

No momento da baixa

Nos embarazos sen complicacións, as mulleres soen decidir continuar traballando e pedir a baixa cando se achegan á semana 36. Dende logo, se o embarazo é múltiple ou hai algún risco engadido, é posible coller a baixa cando o precises. Lembra que unha vez te poñas de parto, tes 3 días para entregar na empresa a baixa por permiso de maternidade. Por outra banda, podes manter o contacto co teu responsable para establecer o momento de reincorporarte ao teu posto ou a necesidade de readaptar o horario ou as responsabilidades laborais.

Cobertura legal

A cobertura da baixa de maternidade depende da base de cotización do teu contrato laboral. Normalmente quedan cubertos todos os traballadores afiliados e dados de alta nalgún réxime da Seguridade Social e que acrediten un período mínimo de cotización. Se tes algunha dúbida debes falar coa túa empresa, o teu sindicato ou achegarte á Seguridade Social. No noso país, no caso de que a nai non teña dereito a suspender o seu labor con dereito a prestación, o pai poderá percibir o subsidio contributivo por maternidade se reúne todos os requisitos.

Xornada parcial durante a baixa

No caso de querer optar pola maternidade a tempo parcial, a lei establece que debe haber sempre acordo entre o empresario e o traballador. Neste caso a nai poderá gozar, dende 10 semanas antes da data de parto, dunha parte do descanso a xornada parcial; tralo parto, e unha vez esgotadas as 6 semanas de descanso obrigatorio, poderá consumir o resto da baixa en réxime en xornada parcial. Isto fará que te incorpores antes ao traballo, pero terás máis flexibilidade horaria durante máis tempo.