O aborto natural

Aínda que a ningunha muller lle guste pensar nisto, o certo é que hai algúns embarazos que non chegan ao seu termo. As razóns poden ser moi diferentes e, ás veces, non se pode facer nada por evitalo.

É imposible falar aquí de todas as razóns que se poden atopar detrás dun embarazo frustrado, entre outras cousas, porque nalgúns casos non se coñecen. Moitas veces é o propio corpo o que determina que un embarazo non podería chegar a bo termo. É sen dúbida un tema delicado, pero cómpre que tamén o coñezas.

Esperanza

A natureza “sabia”

Aínda que poida parecer un tópico, ás veces a natureza fai a súa propia selección. Algúns dos abortos que se producen nas primeiras semanas débense a que o embrión non se está a desenvolver ben.

Os incertos comezos

O maior risco atópase nas 12 primeiras semanas. Nestes casos fálase de aborto precoz. A incidencia deste é alta, especialmente tendo en conta que moitas mulleres non chegan a saber nunca que se trata dun aborto e pensan que están ante unha menstruación tardía e abundante. De todos os xeitos, non te obsesiones mirando o calendario. Goza coa túa parella dende o principio e leva unha vida sa, non podes facer nada máis e preocuparte non te axuda.

Aborto tardío

Se a perda do feto se produce despois da semana 13 denomínase aborto tardío e é moito menos frecuente. Adoita deberse a un problema do útero e o perigo pódese detectar nos recoñecementos médicos. Por iso, se se teñen sospeitas, o médico recomendará gardar un repouso absoluto.

A temida perda de sangue

Unha das imaxes que preocupa a unha embarazada é a de atopar manchas de sangue na súa roupa interior. O certo é que unha importante hemorraxia vaxinal acompañada dunha dor forte na parte inferior das costas pode ser síntoma de aborto. Aínda así non ten porque ser un aborto. Lembra que o sangrado vaxinal prodúcese nun alto número de mulleres embarazadas, pero a maior parte delas teñen no final un bebé san.

Algunhas causas comúns

Rexeitamento natural.

Contacto con certos produtos químicos e fármacos.

Infeccións graves.

Alteracións cromosómicas.

Problemas no útero, na placenta, no colo do útero, nos espermatozoides ou na implantación do óvulo.

Graves desequilibrios hormonais.

Produción de anticorpos.

Dálle tempo ao tempo

Aínda que sexa algo máis común do que se pensa, enfrontar un aborto non é doado. Dálle tempo ao tempo se tes que pasar por isto. Vai amodo, descansa e recapacita para asimilalo mellor. Non te precipites na busca dun novo embarazo e comparte as túas sensacións coa túa parella.

Non te desanimes

O feito de que unha muller sufra un aborto non é definitivo. Se ben é certo que convén deixar un tempo antes de tentar un novo embarazo, na maioría dos casos non hai secuelas posteriores e no futuro poderá ser nai.